وہاڑی: خاتون پر مبینہ تشدد، پولیس پر کارروائی نہ کرنے کا الزام

وہاڑی:-198 ای بی 32 دگلاں والی کی رہائشی پانچ بچوں کی ماں سدرہ بشیر زوجہ عامر علی آرائیں نے الزام عائد کیا ہے کہ 26 اور 28 اگست کو گاؤں کے ممتاز کھرل نے اپنے بیٹوں فیصل کھرل، زوہیب کھرل، ابوبکر کھرل، بھائی معاذ کھرل اور چار نامعلوم افراد کے ہمراہ مبینہ طور پر اس کے گھر میں زبردستی داخل ہو کر اسے تشدد کا نشانہ بنایا۔ متاثرہ خاتون کے مطابق ملزمان نے اس کے بالوں سے پکڑ کر گھسیٹا، ڈنڈوں اور سوٹوں سے مارا پیٹا، جس سے اس کے کپڑے پھٹ گئے، جبکہ نیم برہنہ حالت میں بھی مبینہ طور پر تشدد جاری رکھاگیا سدرہ بشیر نے میڈیا کو بتایا کہ واقعہ کے حوالے سے اس نے تھانہ صدر وہاڑی میں دو درخواستیں دیں، تاہم مبینہ طور پر تاحال مقدمہ درج نہیں کیا گیا۔ خاتون کے مطابق وہ بعد ازاں ڈی پی او وہاڑی کے سامنے بھی پیش ہوئی، جہاں اس نے انصاف کی درخواست کی اور ڈی پی او کی جانب سے ایس ایچ او کو مقدمہ درج کرنے کی ہدایت کی گئی، تاہم اس کا الزام ہے کہ اس کے باوجود پولیس نے کارروائی نہیں کی متاثرہ خاتون نے مزید الزام عائد کیا کہ ملزمان بااثر ہیں اور انہیں مبینہ طور پر دھمکیاں دی جا رہی ہیں اس کے مطابق اسے کہا گیا کہ پولیس سے ان کے تعلقات ہیں اور اس کی کوئی شنوائی نہیں ہوگی خاتون نے دعویٰ کیا کہ اسے پولیس سے رجوع کرنے پر بھی مبینہ طور پر سنگین نتائج کی دھمکیاں دی گئی ہیں سدرہ بشیر کا کہنا تھا کہ اس کا شوہر بیرون ملک محنت مزدوری کرتا ہے، جبکہ ملزمان کے خوف اور مسلسل دھمکیوں کے باعث اس نے اپنے بچوں کو سکول بھیجنا بند کر دیا ہے اس نے خدشہ ظاہر کیا کہ اسے یا اس کے بچوں کو کسی قسم کا نقصان پہنچ سکتا ہے متاثرہ خاتون نے وزیراعلیٰ پنجاب مریم نواز، آئی جی پنجاب اور ڈی پی او وہاڑی سے ہاتھ جوڑ کر اپیل کی ہے کہ واقعے کا فوری نوٹس لیا جائے، مبینہ طور پر ملوث افراد کے خلاف قانون کے مطابق کارروائی کی جائے اور اسے و اس کے بچوں کو تحفظ فراہم کیا جائے دوسری جانب پولیس ترجمان کے مطابق پولیس نے دونوں فریقین کو سنا ملزمان کا گھر جانا ثابت نہیں ہوا جس پر ملزمان کو زیردفعہ 7/51 کاروائی عمل میں لائی گئی تھی۔ اب وہ ضمانت پر ہیں